Cambodia's daily events

អតីត​នាយក​រដ្ឋ​មន្ត្រី​កម្ពុជា លោក ហ៊ុន សែន បាន​អះអាង​នៅ​ល្ងាច​ថ្ងៃ​ទី​៨​មិថុនា​ថា ការ​កែ​សម្រួល​កម្លាំង​កង​ទ័ព​នៅ​តំបន់​មាន​ជម្លោះ​ដែល​ស្រុះស្រួល​គ្នា​រវាង​មេបញ្ជា​ការ​កង​ទ័ព​នៃ​ប្រទេស​ទាំង​ពីរ ​គឺកម្ពុជា និងថៃ ដើម្បី​កុំ​ឲ្យ​ប៉ះទង្គិច​បង្ហូរ​ឈាម​ទ្រង់​ទ្រាយ​ធំ​គឺ​ជា​រឿង​ចាំ​បាច់​។​ តែ​អ្នក​តាម​ដាន​សភាពការណ៍​ខ្លះ​ យល់ថា ​ការ​សម្រេច​ចិត្ត​បែប​នេះ​របស់​កម្ពុជា​ គឺ​ចាញ់​ប្រៀប​ថៃ​។

ក្រសួងពាណិជ្ជកម្មកម្ពុជា កាលពីថ្ងៃទី៣មិថុនា បានឲ្យដឹងថា កម្ពុជា-វៀតណាម បានឯកភាពគ្នាអនុគ្រោះពន្ធដល់០% ចំពោះការនាំចេញ-នាំចូលទំនិញមួយចំនួន សម្រាប់ឆ្នាំ២០២៥-២០២៦។ កម្ពុជាមានលទ្ធភាពនាំចេញទំនិញចំនួន២៨មុខ ទៅវៀតណាមដោយមិនគិតពន្ធ ខណៈវៀតណាមអាចនាំទំនិញមកកម្ពុជាចំនួន២៥មុខ ដោយមិនគិតពន្ធដូចគ្នា។ ទោះជាយ៉ាងនេះក្តី អ្នកសេដ្ឋកិច្ចយល់ថា វៀតណាមនៅតែមានប្រៀបជាងកម្ពុជា ចំពោះការអនុគ្រោះពន្ធ០%នេះ ដោយសារទំនិញរបស់​វៀតណាមដែលនាំចូលមកកម្ពុជា ភាគច្រើនជាបន្លែនិងផ្លែឈើ។

រដ្ឋាភិបាលថៃក្នុងថ្ងៃទី​៥ ខែ​មិថុនា ឆ្នាំ​២០២៥​ម្សិលមិញ បានចេញសេចក្តីថ្លែងការណ៍បញ្ជាក់ជំហរ​ផ្លូវការរបស់ខ្លួនថា ​ថៃនឹងមិនចូលខ្លួនទៅតតាំងរឿង​​ជម្លោះព្រំដែន​ជាមួយកម្ពុជា​នៅតុលាការយុត្តិធម៌​អន្តរជាតិ ICJ នោះទេ។ ការប្រកាសជំហរ​របស់ទីក្រុងបាងកកបែបនេះ ដោយសម្អាងថា ថៃ​​ឈប់ទទួលស្គាល់យុត្តាធិការរបស់តុលាការយុត្តិធម៌អន្តរជាតិ ICJ តាំងពីទសវត្សរ៍ឆ្នាំ ១៩៦០មកម៉្លេះ។ ​ម៉្លោះហើយ រដ្ឋាភិបាលថៃ​នៅតែប្រកាន់ជំហរចរចា​ទ្វេភាគីដើម្បីរក្សាទំនាក់ទំនងល្អរវាងប្រទេសទាំង២។ ហេតុអ្វីកម្ពុជាបន្តប្រកាន់ជំហរប្តឹងថៃទៅ ICJ ខណៈថៃមិនទទួលស្គាល់ ICJ?

ក្នុងសមាជព្រឹទ្ធសភា-រដ្ឋសភាកន្លងទៅ លោកនាយករដ្ឋមន្ត្រី ហ៊ុន ម៉ាណែត បានប្រកាសថា នឹងមានការកែសម្រួលក្រុមការងារដែលកាន់កិច្ចការពិនិត្យគុណភាពទំនិញ បន្លែផ្លែឈើពីក្រៅប្រទេសឡើងវិញ ដើម្បីបញ្ចៀសការជាន់ការងារគ្នា និងម្យ៉ាងដើម្បីធានាគុណភាពទំនិញនាំចូលផង។​ ការលើកឡើងរបស់ប្រមុខរដ្ឋាភិបាលយ៉ាងដូច្នេះ ត្រូវបានអ្នកសិក្សាស្រាវជ្រាវសង្គមសាទរចំពោះចំណាត់ការរបស់រដ្ឋាភិបាល។ តែទន្ទឹមគ្នានេះ អ្នកជំនាញទាំងនោះ​ក៏លើកសំណើឱ្យរដ្ឋាភិបាល ពិនិត្យ តាមដានជាប់ជាប្រចាំទៅលើមន្ត្រីតាមច្រកព្រំដែន​ ដោយធ្វើយ៉ាងណាតម្រូវឱ្យមន្ត្រីទាំងនោះ​ត្រួតពិនិត្យគុណភាពទំនិញឱ្យបានហ្មត់ចត់ ពិសេសពិនិត្យសារធាតុគីមីនៅលើបន្លែ ផ្លែឈើ ត្រី សាច់ដែលនាំចូលមកកម្ពុជា ព្រមទាំងទទូចឱ្យមន្ត្រីច្រកព្រំដែនជៀសវាងការប្រព្រឹត្តអំពើពុករលួយដែលបង្កហានិភ័យដល់សុខភាពពលរដ្ឋខ្មែរ។​

បញ្ហាមិន​ប្រក្រតីមួយចំនួននៃការផ្តល់ប័ណ្ណក្រីក្រ និងបញ្ហានៃការកំណត់អត្តសញ្ញាណកម្មជនក្រីក្រគឺជាប្រធានបទមួយ​ដែល​ត្រូវបានលើកទៅ​ជជែកដេញដោលគ្នា​យ៉ាង​ផុសផុល នៅក្នុង​អង្គសមាជរដ្ឋសភា-ព្រឹទ្ធសភា នាថ្ងៃទី២ ខែមិថុនា ឆ្នាំ​២០២៥។ ប្រធានអង្គសមាជ លោក ហ៊ុន សែន បានស្នើឱ្យរដ្ឋាភិបាលយកចិត្តទុកដាក់លើបញ្ហានេះ។ ចំណែក​ ប្រមុខ​រដ្ឋាភិបាលកម្ពុជា លោក ហ៊ុន ម៉ាណែត ក៏ទទួលស្គាល់ពីបញ្ហានេះដែរ។ តើការអនុវត្តកម្មវិធីចែកប័ណ្ណក្រីក្រនឹងមានប្រសិទ្ធភាពប៉ុណ្ណា ក្រោយសមាជរដ្ឋសភា-ព្រឹទ្ធសភា?

នៅ​ព្រឹក​ថ្ងៃ​ទី​២​ ខែ​មិថុនា ឆ្នាំ​២០២៥​ សមាជ​របស់​រដ្ឋ​សភា ​និង​ព្រឹទ្ធ​សភា​កម្ពុជា ​បាន​អនុម័ត​លើ​សេចក្ដី​ថ្លែង​ការណ៍ ​របស់​​នាយក​រដ្ឋ​មន្ត្រី​ លោក​ ហ៊ុន​ ម៉ាណែត ​ក្នុង​ការ​ប្ដឹង​ករណី​ជម្លោះ​ព្រំ​ដែន​រវាង​កម្ពុជា​ និង​ថៃ ​ទៅ​កាន់​តុលាការ​យុត្តិធម៌​អន្តរ​ជាតិ​(ICJ)​នៅ​ប្រទេស​ហូឡង់​។​ នៅ​មុន​ការ​អនុម័ត​នេះ​ ប្រមុខ​រដ្ឋាភិ​បាល​​កម្ពុជា​ បាន​បញ្ជាក់​ថា ​កម្ពុជា​នឹង​ប្តឹង​ករណី​នៅ​ចំណុច​មុំ​បី​ ករណី​ប្រាសាទ​តាមាន់​ធំ​-តាមាន់​តូច ​និង​ករណី​ប្រាសាទ​តាក្រ​បី ​ទៅ​កាន់​តុលាការ​ICJ​ បើ​ទោះជា​ភាគី​ថៃ​មិន​ព្រម​ក៏​ដោយ​។​ អ្នក​នយោបាយ​បក្ស​ប្រ​ឆាំង​ និង​អ្នក​តាម​ដាន​ស្ថាន​ការណ៍​ព្រំ​ដែន​ បាន​គាំ​ទ្រ​គម្រោង​នេះ​ តែ​ពួកគេ​ចង់​ឲ្យ​កម្ពុជា​ដាក់​បញ្ចូល​ទាំង​សំណុំ​រឿង​ព្រំដែន​គោក និង​ព្រំដែន​ទឹក​(កោះគុត)​ទៅជា​មួយ​ផង​៕

ជម្លោះ​ព្រំ​ដែន​កម្ពុជា និង​ថៃ បាន​កម្រើក​ឡើង​វិញ​រហូត​ឈាន​ដល់​ការ​ផ្ទុះ​អា​វុធ​ដែល​បង្ក​ឡើង​ដោយ​ភាគី​ថៃ ​បណ្តាល​ឲ្យ​ស្លាប់​ទាហាន​កម្ពុជា​ម្នាក់​នៅ​ថ្ងៃ​ទី​២៨ ខែ​ឧសភា​ឆ្នាំ​២០២៥​។​ ការ​កម្រើក​ឡើង​វិញ​នៃ​ជម្លោះ​ព្រំ​ដែន​នៅ​ចំណុច​មុំបី​នៃ​ខេត្ត​ព្រះ​វិហារ​ជាប់​ប្រទេស​ថៃ​នាប៉ុន្មាន​ថ្ងៃមក​នេះ​ ត្រូវ​បាន​អតីត​នាយក​រដ្ឋមន្ត្រី​កម្ពុជា ​លោក ហ៊ុន សែន ចាត់​ទុក​ថា គឺ​ជា​រឿង​ច្រំដែល​នៃ​ល្បិច​កលដែល​ចង់​យក​ដី​របស់​កម្ពុជា​ ដោយ​មេបញ្ជាការ​ថ្នាក់​ក្រោម​ថៃ​ ដែល​មាន​ការ​គាំទ្រ​ពី​ក្រុម​និយម​ជ្រុល​របស់​ថៃ​។​ ក្រុម​អ្នក​តាម​ដាន​សភាពការណ៍​ព្រំដែន​កម្ពជា និងថៃ ក៏យល់​ឃើញ​ដូច​គ្នា​នេះ​ដែរ​។

ប្រធានព្រឹទ្ធសភាកម្ពុជា លោក ហ៊ុន សែន បានបង្ហើបថា កម្ពុជាអាចនឹងប្តឹងករណីវិវាទព្រំដែនដែលមានជាមួយភាគីថៃនៅតំបន់មុំបីទៅតុលាការយុត្តិធម៌អន្តរជាតិ ICJ​ ដើម្បីបំបាត់ការសង្ស័យរវាងប្រទេសទាំងពីរជុំវិញខ្សែបន្ទាត់ពំ្រដែននៅតំបន់នោះ។ អ្នកតាមដានបញ្ហាព្រំដែន​ និងអ្នកជំនាញផ្នែកច្បាប់ និងនយោបាយសាទរនឹងជំហររបស់អតីតនាយករដ្ឋមន្ត្រី ដោយសារកម្ពុជាធ្លាប់ប្តឹងឈ្នះករណីប្រាសាទព្រះវិហារទៅកាន់តុលាការមួយនេះ។​

ក្រោយការប៉ះទង្គិចគ្នាមួយប្រាវរវាងកងទ័ពកម្ពុជា និងថៃកាលពីថ្ងៃទី២៨ ខែឧសភា ឆ្នាំ២០២៥ ត្រង់ចំណុចមុំ៣ ខេត្តព្រះវិហារដែលបណ្តាលឲ្យស្លាប់កងទ័ពកម្ពុជាម្នាក់មក គេសង្កេតឃើញមានចរន្តយកចិត្តទុកដាក់ជាបន្តបន្ទាប់ដល់កងទ័ពជួរមុខពីសំណាក់មហាជនខ្មែរ និងស្ថាប័នសាធារណៈ។ ការផ្តល់កម្លាំងចិត្តនេះធ្វើឡើងតាមរយៈការផ្តល់សម្ភារៈ គ្រឿងឧបភោគបរិភោគ និងថវិកាជូនដល់កងទ័ពការពារព្រំដែន និងក្រុមគ្រួសារយុទ្ធជនដែលបានពលីជីវិតក្នុងបុព្វហេតុការពារទឹកដី។ អ្នកតាមដានសង្គមនានាបានហៅកាយវិការនេះថាជាទឹកចិត្តដ៏ប្រពៃ ដែលបង្ហាញពីការឈឺឆ្អាលដល់បញ្ហាជាតិ និងជាការរួមកម្លាំងសាមគ្គីគ្នានៅក្នុងរង្វង់ប្រជាជាតិខ្មែរ។ តែពួកគេចង់ឃើញសកម្មភាពបែបនេះកើតឡើងញឹកញាប់ ពោលមិនចំពោះតែនៅពេលមានហេតុការណ៍ធំៗទេ។

កងទ័ពថៃ និងកម្ពុជាបានប៉ះទង្គិចគ្នាដោយអាវុធមួយប្រាវកាលពីទៀបភ្លឺថ្ងៃទី២៨ ខែឧសភា ឆ្នាំ២០២៥ នៅចំណុចមុំ៣ នៃខេត្តព្រះវិហារក្នុងទឹកដីកម្ពុជាដោយបណ្តាលឲ្យស្លាប់ទាហានខ្មែរម្នាក់។ តាមក្រសួងការពារជាតិកម្ពុជា ទាហានថៃជាអ្នកលួចវាយឆ្មក់លើទាហានខ្មែរមុន។ អ្នកតាមដានសភាពការណ៍ព្រំដែនកម្ពុជា-ថៃ មើលឃើញថា នេះជាទង្វើបង្កឡើងដោយនយោបាយផ្ទៃក្នុងថៃ និងដែលកម្ពុជាចាំបាច់ត្រូវអភិវឌ្ឍន៍ខ្លួនឯងឲ្យបានខ្លាំងលើវិស័យការពារជាតិ។ ចំណែកអ្នកវិភាគខ្លះទៀត បានទទូចឲ្យកម្ពុជាប្រើប្រាស់យន្តការច្បាប់ដោះស្រាយជាមួយថៃដើម្បីបញ្ចប់វិវាទព្រំដែននៃប្រទេសទាំងពីរ៕

នៅថ្ងៃទី២៦ ខែឧសភា ប្រមុខរដ្ឋាភិបាលកម្ពុជា ឡាវ និងវៀតណាមបានជួបគ្នាក្រៅផ្លូវការមួយអំឡុងពេលចូលរួមកិច្ចប្រជុំកំពូលអាស៊ាននៅម៉ាឡេស៊ី។ មិនខុសពីសព្វមួយដង មេដឹកនាំវៀតណាមបានបន្តផ្តាំផ្ញើឱ្យមេដឹកនាំកម្ពុជា និងឡាវផ្តល់ការគាំទ្រ និងមើលថែពលរដ្ឋខ្លួនដែលកំពុងរស់នៅលើទឹកដីកម្ពុជា និងឡាវដោយសង្កត់ធ្ងន់ថា សុខទុក្ខរបស់ពលរដ្ឋវៀតណាមអាចជះឥទ្ធិពលដល់ទំនាក់ទំនងត្រីភាគីកម្ពុជា ឡាវ និងវៀតណាម។ អ្នកវិភាគសង្គម និងអ្នកនយោបាយចាត់ទុកការផ្តាំផ្ញើរបស់មេដឹកនាំវៀតណាមថាមិនទាស់ខុសឡើយ។ តែថា ការនិយាយច្រំដែលរបស់វៀតណាមនឹងធ្វើឱ្យពលរដ្ឋខ្មែរខ្លះកាន់តែមិនសប្បាយចិត្ត និងខ្លះទៀតមានមន្ទិលសង្ស័យលើរដ្ឋាភិបាល។

នាយករដ្ឋមន្ត្រីម៉ាឡេស៊ី លោក អានវ៉ា អ៊ីប្រាហ៊ីម ក្នុងឋានៈជាប្រធានអាស៊ានប្តូរវេនបានប្រកាសនៅក្នុងកិច្ចប្រជុំកំពូលអាស៊ានលើកទី៤៦ នាថ្ងៃទី២៦ ខែឧសភាថា ម៉ាឡេស៊ីនឹងគាំទ្រប្រទេសទីម័រខាងកើតឲ្យបានចូលជាសមាជិកអាស៊ានពេញសិទ្ធិនៅក្នុងកិច្ចប្រជុំកំពូលអាស៊ានលើកទី៤៧ នាខែតុលា ឆ្នាំ២០២៥ ខាងមុខ។ អ្នកវិភាគនយោបាយ និងទំនាក់ទំនងអន្តរជាតិនានាមើលឃើញថា វត្តមានរបស់ទីម័រខាងកើតក្នុងនាមជាសមាជិកអាស៊ានទី១១ នឹងមានផលវិជ្ជមានផង និងអវិជ្ជមានផង ខណៈប្រទេសសមាជិកអាស៊ានបច្ចុប្បន្នពិបាករកចំណុចឯកភាពគ្នាស្តីពីសំណុំរឿងធំៗទាំងក្នុងតំបន់ និងអន្តរជាតិ។

អតីត​ឧកញ៉ា លោក ហេង សិទ្ធី ត្រូវ​បាន​អា​ជ្ញា​ធរ​រុស្ស៊ី​ចាប់​បញ្ជូន​មក​ដល់​ប្រទេស​កម្ពុជា​កាល​ពី​ថ្ងៃទី​២៤ ខែ​ឧសភា ឆ្នាំ២០២៥ តាម​សំណើ​របស់​ក្រសួង​យុត្តិធម៌​កម្ពុជា​។​ សាលា​ដំបូង​រាជ​ធានី​ភ្នំពេញ​បាន​ប្រកាស​ថា ​ឈ្មោះ ហេង សិទ្ធី ត្រូវ​បាន​ចោទ​ប្រកាន់​ពី​បទ​ «គំរាម​ហែក​កេរ្តិ៍ មាន​ស្ថាន​ទម្ងន់​ទោស»​។​ ចំណាត់​ការ​នេះកើត​ឡើង បន្ទាប់ពី ​លោក​ ហេង សិទ្ធី​បាន​ប្រើប្រាស់​បណ្តាញ​ទំនាក់​ទំនង​សង្គម​បរិហារ​លើ​មន្ត្រីជាន់​ខ្ពស់​កម្ពុជា​មួយ​ចំនួន​រួម​នឹង​ឧកញ៉ា​ខ្លះ​ពី​បទ​ប្រព្រឹត្ត​អំពើ​ពុក​រលួយ​ជាប្រព័ន្ធ​ក្នុង​អំពើ​ឆបោក​តាម​អន​ឡាញ​នៅ​កម្ពុជា​។

សមាជិករដ្ឋសភាជប៉ុន លោក ណាអូតូ សាកាហ្គុជិ បានអះអាងនៅក្នុងកិច្ចប្រជុំរដ្ឋសភាជប៉ុនកាលពីថ្ងៃទី២១ឧសភាថា ខ្លួនបានរងការគំរាមកំហែងសិទ្ធិសេរីភាព ពីសំណាក់ឯកអគ្គរាជទូតកម្ពុជាប្រចាំប្រទេសជប៉ុន។ មកទល់ពេលនេះ នៅមិនទាន់មានការឆ្លើយតបជាផ្លូវការពីសំណាក់ស្ថានទូតកម្ពុជាប្រចាំប្រទេសជប៉ុន និងក្រសួងការបរទេសកម្ពុជានៅឡើយ។ ក៏ប៉ុន្តែមន្ត្រីបក្សកាន់អំណាច យល់ថា ការលើកឡើងរបស់សមាជិករដ្ឋសភាជប៉ុន គ្រាន់ជាសេរីភាពបញ្ចេញមតិ ខណៈដែលឯកអគ្គរាជទូតកម្ពុជាប្រចាំប្រទេសជប៉ុន ក៏មានសិទ្ធិការពារអធិបតេយ្យភាពកម្ពុជា។

នៅ​ក្នុង​កិច្ច​ប្រជុំ​គណៈ​រដ្ឋ​មន្ត្រី ថ្ងៃ​ទី​២៣​ ខែ​ឧសភា​ ឆ្នាំ​២០២៥ ​ប្រមុខ​រដ្ឋាភិ​បាល​កម្ពុជា បាន​ណែនាំ​ឲ្យក្រសួង​ធម្មការ​ និង​សាសនា ​ទប់​ស្កាត់​សកម្ម​ភាព​របស់​បុគ្គល​មួយ​ចំនួន​ដែល​តាំង​ខ្លួន​ជា​អ្នក​មាន​បារមី ​និង​ដែល​បាន និង​កំពុង​តែ​ប្រើ​ប្រាស់​បណ្តាញ​សង្គម​ដើម្បី ​បង្ហាញ​ពី​សកម្ម​ភាព​របស់​ពួកគេ​។ ​លោក​នា​យក​រដ្ឋ​មន្ត្រី ​ហ៊ុន ​ម៉ាណែត ​ចាត់​ទុក​សកម្ម​ភាព​នេះ​ថា​បង្ក​ឲ្យមាន​ភាព​ច្របូល​​ច្រ​បល់​ក្នុង​សង្គម​។ ​ ហេតុ​អ្វី​សកម្ម​ភាព​បុគ្គល​ដែល​តាំង​ខ្លួន​ជា​«គ្រូបារមី»​នៅ​តែ​បន្ត​កើត​មាន​ ខណៈ​ដែល​វិធានការ​ត្រូវបាន​ដាក់​ចេញ​ជា​បន្ត​បន្ទាប់​នាពេល​កន្លងមក?

នៅថ្ងៃសុក្រ ទី២៣ ឧសភានេះ បណ្តាញអាស៊ីសម្រាប់ការបោះឆ្នោតដោយសេរី (ANFREL) បានចេញផ្សាយរបាយការណ៍មួយដោយអះអាងថា ដំណើរការលទ្ធិប្រជាធិបតេយ្យនៅក្នុងប្រទេសកម្ពុជាត្រូវបានបដិសេធ។ តាម ANFREL គណបក្សប្រជាជនកម្ពុជា គឺជាគណបក្សគ្រប់គ្រងអំណាចយ៉ាងតឹងរឹង បើទោះបីជាបច្ចុប្បន្ន រដ្ឋសភា និងព្រឹទ្ធសភាមានសមាជិកមកពីគណបក្សនយោបាយផ្សេងក៏ដោយ។ អ្នកជំនាញផ្នែកប្រជាធិបតេយ្យយល់ឃើញថា របាយការណ៍ ANFREL បានឆ្លុះបញ្ចាំងពីការដើរថយក្រោយនៃលទ្ធិប្រជាធិបតេយ្យនៅកម្ពុជា។ តែអ្នកនាំពាក្យគណបក្សកាន់អំណាចបានទាត់ចោលទាំងស្រុង និងឆ្លើយបកវិញថា គឺអ្នកធ្វើរបាយការណ៍ទៅវិញទេទើបជាអ្នកគ្មានប្រជាធិបតេយ្យ។

នៅក្នុងប្រទេសសិង្ហបុរី គណៈរដ្ឋមន្ត្រីថ្មីដែលមានសមាជិកចំនួន ១៧នាក់ល្បីល្បាញខាងពូកែធ្វើការ។ តែសមាសភាពគណៈរដ្ឋមន្ត្រីថ្មីរបស់ប្រទេសសមាជិកអាស៊ានដែលមានប្រជាជន ៦លាននាក់ និងផ្ទៃដីតែជាង៧០០គីឡូម៉ែត្រការ៉េមួយនេះ ត្រូវបានមហាជនលើកយកមកជជែកគ្នាតាមបណ្តាញសង្គម និងផ្សព្វផ្សាយតាមបណ្តាញព័ត៌មានក្នុងប្រទេសកម្ពុជាផងដែរ។ សិង្ហបុរីមាន GDP ចំនួន ៨៦ ០០០ដុល្លារ ហើយកម្ពុជាមាន GDP ជាង២០០០ដុល្លារសម្រាប់មនុស្សម្នាក់។ នៅកម្ពុជា គណៈរដ្ឋមន្ត្រីថ្មីមានសមាជិកជាង៥០នាក់ តែបើគិតទាំងមន្ត្រីនយោបាយ(រដ្ឋលេខាធិការ និងអនុរដ្ឋលេខាធិការ) គឺមានដល់ជាង ១ពាន់នាក់។ អ្នកវិភាគនានាយល់ឃើញថា កម្ពុជា និងសិង្ហបុរីមានស្ថានភាពខុសគ្នាជាច្រើនដែលគេមិនអាចប្រៀបធៀបគ្នាបានទេ។

លោកនាយករដ្ឋមន្ត្រី ហ៊ុន ម៉ាណែត បានថ្លែងក្នុងថ្ងៃទី២១ ខែឧសភាថា គុណភាពអប់រំកម្ពុជាខ្លាំង លុះត្រាតែរដ្ឋាភិបាលអាចទាក់ទាញគ្រូបង្រៀនមកសាលារដ្ឋឱ្យបានច្រើន។ ការលើកឡើងយ៉ាងដូច្នេះរបស់លោក ហ៊ុន ម៉ាណែតត្រូវបានអ្នកជំនាញផ្នែកសង្គម និងអប់រំខ្លះចាត់ទុកជារឿងមិនខុសឡើយ។ តែអ្នកជំនាញខ្លះទៀតយល់ថា ការទាក់ទាញគ្រូបង្រៀនមកសាលារដ្ឋច្រើនក៏នៅមិនទាន់គ្រប់គ្រាន់ដែរ ពោលរដ្ឋាភិបាល តាមរយៈក្រសួងអប់រំត្រូវផ្តោតលើការពង្រឹងសមត្ថភាព និងគុណភាពរបស់គ្រូបង្រៀនបន្ថែមទៀត។

ជារឿយៗ មិនថានៅភ្នំពេញ ឬនៅតាមបណ្តាខេត្តមួយចំនួននៅកម្ពុជា គេតែងឃើញមានអ្នកលោត ឬធ្លាក់ពីលើអគារខ្ពស់ដែលភាគច្រើនជាជនបរទេស។ ជាក់ស្តែងនៅព្រឹកថ្ងៃទី២០ ខែឧសភានេះ មានជនបរទេសម្នាក់បានធ្លាក់ពីលើសណ្ឋាគារមួយនៅសង្កាត់ផ្សារកណ្តាល ខណ្ឌដូនពេញ រាជធានីភ្នំពេញបណ្តាលឲ្យស្លាប់ភា្លមៗ។ នៅប៉ុន្មានថ្ងៃមុននេះ មានស្ត្រីជនជាតិចិន និងខ្មែរបានធ្លាក់ពីលើអគារខ្ពស់ស្លាប់នៅភ្នំពេញដែរ។ ករណីនេះត្រូវបានអ្នកតាមដានសង្គមមើលឃើញថា គឺជារឿងគួរឲ្យភា្ញក់ផ្អើល និងត្រូវមានការស៊ើបអង្កេតឲ្យបានជាក់លាក់ដើម្បីទប់ស្កាត់ និងរកយុត្តិធម៌ជូនជនរងគ្រោះ ប្រសិនបើជារឿងឃាតកម្ម។

តាម​គម្រោង ប្រមុខ​រដ្ឋាភិ​បាល​កម្ពុជា លោក ហ៊ុន ម៉ាណែត ​នឹង​ទៅ​ប្រទេស​ជប៉ុន​នាថ្ងៃ​ទី​៣០ ខែ​ឧសភា ឆ្នាំ​២០២៥ ដើម្បី​ចូល​រួម​នៅ​ក្នុង​សន្និសីទ​អន្តរ​ជាតិ​។​ ជា​ការ​កត់​សម្គាល់​ នៅ​ពេល​ដែល​មាន​មេដឹក​នាំ​កម្ពុជា​ចេញ​ទៅ​ក្រៅ​ប្រទេស​ម្តងៗ គេ​សង្កេត​ឃើញ​មាន​ពល​រដ្ឋ​ខ្មែរ​មួយ​ក្រុម​ចេញ​មុខ​ប្រកាស​ទទួល​ស្វាគមន៍​ ខណៈ​មាន​ពលរដ្ឋ​ខ្មែរ​មួយ​ក្រុម​ទៀត​ដែល​នៅ​ក្រៅប្រទេស​ស្រាប់​ចេញ​មុខ​ប្រកាស​ធ្វើ​បាតុកម្ម​។​ តើសកម្ម​ភាព​ទាំង​ពីរ​នេះ​ឆ្លុះ​បញ្ចាំង​យ៉ាង​ណា​ពី​ស្ថាន​ភាព​ប្រទេស​កម្ពុជា​បច្ចុប្បន្ន និង​ថា តើ​សកម្មភាព​ទាំង​ពីរ​នេះ​ចំណេញ ឬ​ខាត​សម្រាប់​កម្ពុជា​?