Daily interviews

កងទ័ពកម្ពុជា និងកងទ័ពថៃបានប៉ះទង្គិចគ្នាដោយអាវុធមួយប្រាវកាលពីថ្ងៃទី២៨ ខែឧសភា ឆ្នាំ២០២៥ នៅចំណុចព្រំដែនមុំ៣ ក្នុងខេត្តព្រះវិហារ ដែលបណ្តាលឲ្យទាហានកម្ពុជាម្នាក់បាត់បង់ជីវិត។ ហេតុការណ៍នេះបានរុញឲ្យស្ថានការណ៍ព្រំដែនរវាងកម្ពុជា និងថៃ មានភាពតានតឹង ដោយកម្ពុជាបានចោទប្រកាន់ទាហានថៃថាបានលួចវាយឆ្មក់មកលើទាហានកម្ពុជា។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី០៤ ខែមិថុនា ឆ្នាំ២០២៥នេះ លោក ហូ វណ្ឌី ទីប្រឹក្សាសមាគមទេសចរណ៍កម្ពុជាបានសម្តែងនូវការព្រួយបារម្ភចំពោះហេតុការណ៍ដែលបានកើតឡើង និងថាហេតុការណ៍នេះនឹងប៉ះពាល់ធំធេង ដល់វិស័យទេសចរណ៍នៃប្រទេសទាំងពីរ ប្រសិនបើមិនមានដំណោះស្រាយ៕

ពល​រដ្ឋ​ខ្មែរ​កម្ពុជា​ក្រោម​នៅ​លើ​ពិភព​លោក រួម​ទាំង​កម្ពុជា​នឹង​ប្រារព្ធ​ខួប​៧៦​ឆ្នាំ​នៃ​ថ្ងៃ​ដែល​បារាំង​ផ្ទេរ​ដែន​ដីកម្ពុជា​ក្រោម​ទៅ​ឲ្យ​វៀត​ណាម​ត្រួត​ត្រា ​កាល​ពី​ថ្ងៃ​ទី​៤ ​មិថុនា​ ឆ្នាំ​១៩៤៩​។​ ក្នុង​បទ​សម្ភាស​ជា​មួយ​វិទ្យុ​បារាំង​អន្តរ​ជាតិ​RFI​ នៅ​ថ្ងៃទី​៣ ខែ​មិថុនា​ ឆ្នាំ​២០២៥ ​លោក ​សឺន ជុំជួន ​អគ្គលេខា​ធិការ ​សមាគម​ខ្មែរ​កម្ពុជា​ក្រោម​ ដើម្បី​សិទ្ធិ​មនុស្ស ​និង​អភិវឌ្ឍន៍ ​ថ្លែង​ថា​ បើ​ទោះ​ជា​អង្គ​ការ​សហ​ប្រជា​ជាតិ​ផ្តល់​អនុសាសន៍​ជាង​៣០០​ចំណុច​ឲ្យ​វៀត​ណាម​គោរ​ពសិទ្ធិ​ជន​ជាតិ​ដើម​ក៏ដោយ​ ក៏វៀតណាមនៅតែ​បន្ត​គាប​សង្កត់​កាន់​តែ​ខ្លាំងឡើង​ទៅ​លើ​ពលរដ្ឋ​ខ្មែរ​ក្រោម​។ ​បើ​តាម​ លោក ​សឺន ​ជុំជួន ​មាន​ពល​រដ្ឋ​ខ្មែរ​ក្រោម ​និង​ព្រះ​សង្ឃ​ជិត​២០​អង្គ/​នាក់​ត្រូវ​បាន​ចាប់​ឃុំ​ខ្លួន​ក្នុង​ឆ្នាំ​២០២៣ ​និង​ឆ្នាំ២០២៤​ ដោយ​សារ​តែ​ការ​បញ្ចេញ​មតិ​៕

ក្រោយហេតុការណ៍ប៉ះទង្គិចដោយអាវុធរវាងកងទ័ពកម្ពុជានិងកងទ័ពថៃ នៅតំបន់មុំបី កាលពីថ្ងៃទី២៨ឧសភា មានពលរដ្ឋជាង១០០គ្រួសារបានជម្លៀសខ្លួនចេញពីលំនៅឋាន ដើម្បីរកកន្លែងមានសុវត្ថិភាព។ នៅក្នុងបទសម្ភាសជាមួយវិទ្យុបារាំងអន្តរជាតិ នៅថ្ងៃទី១ ខែមិថុនា លោក គឹម ចាន់បញ្ញា អភិបាលរងខេត្តព្រះវិហារ បានឲ្យដឹងថា មានពលរដ្ឋ១១៩គ្រួសារ ត្រូវបានអាជ្ញាធរឲ្យស្នាក់អាស្រ័យនៅកន្លែងសុវត្ថិភាព ដែលមានចម្ងាយឆ្ងាយពីតំបន់ប៉ះទង្គិចប្រមាណ ១១៥គីឡូម៉ែត្រ។ ក៏ប៉ុន្តែមកដល់ថ្ងៃទី៣១ឧសភា អាជ្ញាធរបានសម្រេចចិត្តបញ្ជូនពលរដ្ឋទាំងនោះ ទៅលំនៅឋានរៀងៗខ្លួន ដោយសារស្ថានភាពបានស្ងប់ស្ងាត់។ យ៉ាងនេះក្តី លោកថា អាជ្ញាធរនៅបម្រុងវិធានការសុវត្ថិភាពបន្ថែមទៀតចំពោះពលរដ្ឋដែលរស់នៅកៀកនឹងតំបន់មុំបី។

មន្ទីរ​ពេទ្យ​ជាតិ​តេជោ​សន្តិភាព​បាន​ត្រៀម​គ្រែ​ពេទ្យ​ជាង​១​ពាន់​កន្លែង​សម្រាប់​ទទួល​អ្នក​ជំងឺ​ឆ្លង​ គ្រា​ដែល​កូវីដ​១៩​ប្រភេទ​JN.1​បាន​កម្រើក​ឡើង​វិញ​នា​ប៉ុន្មាន​សប្តាហ៍​កន្លងមកនេះ​។​ ក្នុង​បទ​សម្ភាស​ជាមួយ​វិទ្យុ​បារាំង​អន្តរ​ជាតិ​RFI ​នៅថ្ងៃ​ទី​៣១ ខែ​ឧសភា​នេះ ​លោក​វេជ្ជ​បណ្ឌិត ណូ សុភា នាយក​រង​មន្ទីរ​ពេទ្យ​ជាតិ​តេជោ​សន្តិភាព ថ្លែង​ថា​ ត្បិត​នៅ​ប្រទេស​ជិត​ខាង​មាន​ការ​ផ្ទុះ​ខ្លាំង​ជំងឺ​កូវីដ​១៩​ប្រភេទ​JN.1 ​សម្រប់​កម្ពុជា ​លោក​ថា ​មិន​គួរ​ភ័យ​ព្រួយ​បារម្ភ​ខ្លាំង​ពេក​នោះ​ទេ​។​ តែ​លោកបាន​ពន្យល់​ថា​ ការ​ទៅ​ចាក់​វ៉ាក់​សាំង​នៅ​តែ​ជា​រឿង​សំ​ខាន់​៕

កង្វះធនធានទឹកជាឧបសគ្គចម្បងសម្រាប់ការអភិវឌ្ឍន៍ជនបទកម្ពុជាដែលប្រជាពលរដ្ឋភាគច្រើនជាកសិករ។ ដើម្បីធានាឱ្យមានទឹកខួបប្រាំង ខួបវស្សាប្រើប្រាស់នៅតំបន់ជនបទ រដ្ឋមន្ត្រីក្រសួងពាក់ព័ន្ធចំនួន៣ គឺក្រសួងកសិកម្ម ក្រសួងធនធានទឹក និងក្រសួងអភិវឌ្ឍន៍ជនបទបានជួបប្រជុំគ្នាលើកទី៤ ស្តីពី «កសិកម្ម-ទឹក-ជនបទ»។ កម្មវត្ថុ គឺលើកកម្ពស់ប្រសិទ្ធភាពសេដ្ឋកិច្ចវិស័យកសិកម្មកម្ពុជា តាមរយៈការកសាងអាងស្តុកទឹក ប្រព័ន្ធធារាសាស្ត្រ និងការប្រើប្រាស់កម្មវិធីទាញយកព័តមានឧតុនិយម។ ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃទី៣០ ឧសភា លោក ពិត ករុណា អ្នកនាំពាក្យក្រសួងអភិវឌ្ឍន៍ជនបទលើកឡើងថា ជំនួបត្រីវិស័យនេះនឹងពន្លឿនការដោះស្រាយកង្វះធនធានទឹកនៅកម្ពុជា។

ចាប់ពីថ្ងៃទី២៩ ខែឧសភា ដល់ថ្ងៃទី០១ ខែកក្កដា ឆ្នាំ២០២៥ មានព្រះសង្ឃ និងគ្រហស្ថចំនួន ៣០អង្គ/នាក់ នឹងធ្វើធម្មយាត្រាថ្មើរជើងនៅលើជួរភ្នំក្រវាញដោយឆ្លងកាត់ខេត្តកោះកុង កំពង់ស្ពឺ និងពោធិ៍សាត់។ ធម្មយាត្រានេះធ្វើឡើងក្រោមប្រធានបទ «ដំណើរអភិរក្ស (Wolk To Preserve)» ដែលមានចម្ងាយ ២៧០គីឡូម៉េត្រ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី២៨ ខែឧសភា ឆ្នាំ២០២៥ នេះ សម្តេចព្រះមហាអរិយវង្ស យ៉ន សេងយៀត ព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហនុរាជ និងជាព្រះចៅអធិការវត្តឧណ្ណាលោម បានមានសង្ឃដីកាថាការធ្វើធម្មយាត្រានេះ គឺដើម្បីលើកកម្ពស់ការយល់ដឹងពីសារៈសំខាន់នៃព្រៃឈើ រួមនឹងការការពារ និងអភិរក្សព្រៃឈើខ្មែរ៕

វីដេ​អូចេញ​ផ្សាយ​ដោយ​គេ​ហ​ទំព័រ​ Mother Natural Cambodia នៅ​ថ្ងៃ​ទី​២៦ ខែ​ឧសភា ឆ្នាំ​២០២៥ បាន​បង្ហាញ​ឲ្យ​ឃើញ​ថា ​មាន​ទូក​នេសាទ​វៀត​ណាម​យ៉ាង​តិច ​១០៦៦​គ្រឿង​បាន​ចូល​នេសាទ​ក្នុង​សមុទ្រ​កម្ពុជា​ចាប់​ពី​ឆ្នាំ​២០២១ ដល់​ឆ្នាំ​២០២៥​។​ បទ​ល្មើស​នេសាទ​នេះ​កើត​ឡើង​នៅ​ខេត្ត​កំពត​ ព្រះសីហនុ ​និងកោះកុង​។​ ក្រសួង​កសិកម្ម​កម្ពុជា​នៅ​មិន​ទាន់​មាន​ប្រតិកម្ម​យ៉ាង​ណាលើ​វីដេអូ​នេះ​ទេ​។​ នៅ​ក្នុង​បទ​សម្ភាស​ជាមួយ​វិទ្យុ​បារាំង​អន្តរ​ជាតិ​ RFI​ ស្ថាបនិក​អង្គការ​ចលនា​មាតា​ធម្មជាតិ ​លោក អាឡិចហាន់ដ្រូ ​ហ្គន់សាឡេស​ ដេវីដសុន បាន​អះអាង​ថា ​អ្នក​នេសាទ​វៀត​ណាម​បាន​សារ​ភាព​ប្រាប់​ក្រុម​អ្នក​ស៊ើប​អង្កេត​ថា​ ពួកគេ​អាច​ចូល​ដែន​ទឹក​កម្ពុជា​ដោយ​សេរី​។​ តាម​លោក អាឡិច​ ក្រៅពី​ទូក​នេសាទ​វៀត​ណាម ​កាប៉ាល់​នេសាទ​ថៃ និង​ចិន​ក៏​ឧស្សាហ៍​រំលោភ​ចូល​ដែន​ទឹក​របស់​កម្ពុជា​ដែរ​។

ការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិប្រចាំកម្ពុជា នៅថ្ងៃទី២១ ឧសភា បានចេញផ្សាយសេចក្តីថ្លែងការណ៍មួយ ដោយទាញការប្រកាសអាសន្នចំពោះឧក្រិដ្ឋកម្មឆបោកអនឡាញនៅអាស៊ីអាគ្នយ៍។ OHCHR បានចង្អុលដោយចំៗទៅលើប្រទេសចំនួន៥ រួមមាន កម្ពុជា ឡាវ ភូមា ហ្វីលីពីន និងម៉ាឡេស៊ី។ នៅក្នុងបទសម្ភាសជាមួយវិទ្យុបារាំងអន្តរជាតិ នាថ្ងៃសៅរ៍ទី២៤ឧសភា លោកស្រី ជូ ប៊ុនអេង អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ទទួលស្គាល់ការលើកឡើងរបស់OHCHR អាចត្រឹមត្រូវ តែមិនទាន់ពេញលេញនៅឡើយ។ មិនពេញលេញ ព្រោះរបាយការណ៍មិនបានចង្អុលប្រទេសផ្សេងៗទៀត ដែលលោកស្រី ជឿថា ក៏មានឧក្រិដ្ឋកម្មឆបោកអនឡាញដូចគ្នា។ លើសពីនេះ លោកស្រី​បានបង្ហាញការខកចិត្ត ដែលឈ្មោះរបស់ខ្លួន ក៏ត្រូវគេចោទប្រកាន់ថា ឃុបឃិតបានផលប្រយោជន៍ពីឧក្រិដ្ឋជនឆបោកអនឡាញ។

ចាប់ពីថ្ងៃទី១៦ ដល់ថ្ងៃទី២២ ខែឧសភា ឆ្នាំ២០២៥ អាជ្ញាធរជាតិព្រះវិហារបានសហការជាមួយអង្គការយូណេស្កូចុះសិក្សាវាយតម្លៃមុខសញ្ញាគ្រោះថ្នាក់ ហានិភ័យ និងគ្រោះមហន្តរាយ ដែលនឹងអាចកើតមានដល់ប្រាសាទ សហគមន៍ និងធនធានធម្មជាតិនៅក្នុងរមណីយដ្ឋានប្រាសាទកោះកេរ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី២៣ ខែឧសភា ឆ្នាំ២០២៥ លោក គង់ ពុទ្ធិការ អគ្គនាយកនៃអាជ្ញាធរជាតិព្រះវិហារបានហៅបញ្ហាធំៗចំនួន៣ គឺខ្យល់កន្ត្រាក់ ជំនន់ទឹកភ្លៀង និងភ្លើងឆេះព្រៃថាជាបញ្ហាប្រឈមដ៏សំខាន់ ដែលមានហានិភ័យដល់រមនីយដ្ឋានប្រាសាទកោះកេរ និងដែលត្រូវមានការដោះស្រាយរួម៕

កាលពីដើមខែឧសភា ឆ្នាំ២០២៥ នេះ សាលារាជធានីភ្នំពេញបានជូនដំណឹងស្តីពីវឌ្ឍនភាពនៃការងាររបស់ខ្លួនទាក់នឹងគម្រោងវិនិយោគហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹកដើម្បីចៀសវាងការជន់លិចរាជធានីភ្នំពេញ។ គម្រោងនេះសម្រេចបាន៨០% នៃផែនការហើយ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី២១ ខែឧសភា ឆ្នាំ២០២៥នេះ លោក ឃួង ស្រេង អភិបាលរាជធានីភ្នំពេញបានបញ្ជាក់ថា រាជធានីភ្នំពេញអាចទប់ទល់ការជន់លិចបានសម្រាប់កំរិតទឹកភ្លៀងក្រោមកំរិត ១០០មីលីម៉ែត្រ និងថា ការរំដោះទឹកពីរាជធានីភ្នំពេញនឹងទទួលបានជោគជ័យច្រើន នៅពេលគម្រោងនេះត្រូវបញ្ចប់ក្នុងរយៈពេល ២ខែខាងមុខ៕

លោក អ៊ុក ម៉ៅ អ្នក​សារ​ព័ត៌​មាន​ម្នាក់​ប្រចាំ​ខេត្ត​ស្ទឹង​ត្រែង​ត្រូវ​បាន​ឃុំខ្លួន​នៅយប់​ថ្ងៃ​ទី​១៦​ ខែ​ឧសភា​ឆ្នាំ​២០២៥ ក្រោម​ការ​ចោទ​ប្រកាន់​ពី​បទ​ញុះ​ញង់ និង​បរិហារ​កេរ្តិ៍​។​ នេះ​បើ​តាម​សមាគម​អាដហុក​ដែល​យល់​ព្រម​ផ្តល់​មេធា​វី​ការ​ពារ​ក្តី​ជូន​ លោក អ៊ុក ម៉ៅ។​ នៅ​ក្នុង​បទ​សម្ភាស​ជាមួយ​វិទ្យុ​បារាំង​អន្តរ​ជាតិ​ RFI​ នា​ថ្ងៃ​ទី២០ ខែ​ឧសភា ​លោក នី សុខា ប្រធាន​សមាគម​អាដហុក​យល់ថា ការ​ចាប់​ខ្លួន​សកម្មជន​បរិស្ថាន​រូប​នេះ​ធ្វើឡើង​ដោយ​ពុំ​ត្រឹម​ត្រូវ​ ព្រោះចាប់​ទាំង​ពាក់​កណ្តាល​អាធ្រាត្រ និង​ពុំ​បាន​បង្ហាញ​ដី​កា​ជា​មុន​។ ​ក្នុង​ន័យ​នេះ​ ​លោក​ នី​ សុខា ​បាន​ស្នើ​ឲ្យ​ក្រសួង​យុត្តិធម៌​បើក​ការ​ស៊ើប​អង្កេត​ដោយ​តម្លាភាព​លើ​ការ​ចាប់​ខ្លួន​អ្នក​សារព័ត៌​មាន​ក្រីក្រ​អាយុ​៥៧​ឆ្នាំ​ លោក​ អ៊ុក​ ម៉ៅ​។

ក្រោយការកាត់ទោសឲ្យជាប់ពន្ធនាគារចំនួន៤ឆ្នាំ កាលពីដើមខែឧសភា លោក រ៉ុង​ ឈុន ទីប្រឹក្សាគណបក្សកម្លាំងជាតិ ក៏ត្រូវបណ្តាអង្គទូតលោកខាងលិចមួយចំនួន ហៅទៅពិភាក្សាពីបញ្ហាសិទ្ធិមនុស្ស និងនយោបាយ នៅកម្ពុជា។ កាលពីថ្ងៃទី១៦ ឧសភា លោកបានជួបឯកអគ្គរដ្ឋទូតបារាំង និងឯកអគ្គរដ្ឋទូតសហភាពអឺរ៉ុបប្រចាំកម្ពុជា ដើម្បីលើកឡើងពីបញ្ហាប្រឈមផ្នែកនយោបាយក្នុងការអនុវត្តសកម្មភាពរបស់គណបក្សប្រឆាំង រួមទាំងសំណុំរឿងនយោបាយផ្ទាល់ខ្លួនរបស់លោកផង។ នៅក្នុងបទសម្ភាសជាមួយវិទ្យុបារាំងអន្តរជាតិ នាថ្ងៃអាទិត្យទី១៨ឧសភានេះ លោក រ៉ុង​ ឈុន បានអះអាងថា ការកាត់ក្តីសំណុំរឿងនយោបាយផ្ទួនៗប្រឆាំងរូបលោកនាពេលថ្មីៗនេះ បានអង្រួនការចាប់អារម្មណ៍ពីសំណាក់បណ្តាទូតលោកខាងលិច ដែលតែងតាមដានពីបញ្ហាសិទ្ធិមនុស្ស និងប្រជាធិបតេយ្យនៅកម្ពុជា។

លោក ទីវ តារារិទ្ធិ គឺជាអ្នកជិះកង់ពីកម្ពុជាឆ្ពោះទៅទ្វីបអឺរ៉ុបក្នុងបេសកកម្មរៃអង្គាសថវិកាជួយដល់កុមារកម្ពុជា។ ក្នុងយុទ្ធនាការនេះ លោក ទីវ តារារិទ្ធិបានជិះកង់ចេញពីមន្ទីរពេទ្យកុមារអង្គរ ខេត្តសៀមរាប កាលពីខែមិថុនា ឆ្នាំ២០២៤ ដោយត្រូវឆ្លងកាត់ប្រទេសមួយចំនួនក្នុងទ្វីបអាស៊ីឆ្ពោះទៅទ្វីបអឺរ៉ុប។ ក្នុងរយៈពេល ១១ខែ លោក ទីវ តារារិទ្ធដែលទើបត្រឡប់មកដល់កម្ពុជាវិញនៅថ្ងៃទី៣០ ខែមេសាបានជិះកង់ឆ្លងកាត់ប្រទេសចំនួន ១៥ លើចម្ងាយផ្លូវជិត ២ម៉ឺនគីឡូម៉ែត្រ។ ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃទី១៦ ឧសភានេះ លោក ទីវ តារារិទ្ធិ ប្តេជ្ញាបន្តជិះកង់ទៅទ្វីបអាហ្វ្រិកបន្តទៀតដើម្បីរៃអង្គាសថវិកាឲ្យបាន ២៥ម៉ឺនដុល្លារសម្រាប់ជួយមន្ទីរពេទ្យកុមារអង្គរ និងមន្ទីរពេទ្យគន្ធបុប្ផា។ តាមលោក ទីវ តារារិទ្ធិ ការជិះកង់ទៅទ្វីបអឺរ៉ុបអាចជាបេសកកម្មចុងក្រោយក្នុងយុទ្ធនាការជិះកង់ជួយកុមារកម្ពុជា៕

គិតត្រឹមឆមាសទី១ ដើមឆ្នាំ២០២៥ នេះ អគ្គិភ័យបានកើតឡើងចំនួន ២៦៦លើក ពោលថយចុះចំនួន ៣១លើកធៀបនឹងរយៈពេលដូចគ្នាក្នុងឆ្នាំ ២០២៤។ តែចំនួនអ្នកស្លាប់ដោយសារអគ្គិភ័យមានចំនួន១៤នាក់ ពោលកើនឡើងចំនួន ៧នាក់ធៀបនឹងរយៈពេលដូចគ្នាក្នុងឆ្នាំ២០២៤។ រីឯចំនួនផ្ទះ និងតូបដែលបានឆេះមានការថយចុះច្រើន។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី១៤ ខែឧសភា ឆ្នាំ២០២៥ នេះ លោកឧត្ដមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិក្រសួងមហាផ្ទៃបានកត់សម្គាល់ថា នៅដើមឆ្នាំ២០២៥នេះ អគ្គិភ័យបានកើតឡើងច្រើនលើរោងចក្រ និងក្លឹបកំសាន្តដែលពុំមានប្រព័ន្ធបង្ការអគ្គិភ័យឲ្យបានត្រឹមត្រូវ។

លោក អ៊ុក ម៉ៅ អ្នក​សារ​ព័ត៌​មាន​ផ្នែក​បរិស្ថាន​ប្រចាំ​ខេត្ត​ស្ទឹង​ត្រែង បាន​អះអាង​ថា ​លោក​បាន​រង​បណ្តឹង​នៅ​តុលា​ការ​សរុប​១៤​ករណី​ដោយ​សារ​តែលោក​បាន​រាយការណ៍​ពី​ការ​ឃុប​ឃិត​គ្នា​រវាង​មន្ត្រី និង​ក្រុម​អ្នក​កាប់ឈើ​នៅ​តំបន់​នោះ​។ ក្នុង​បទ​សម្ភាស​ជា​មួយ​វិទ្យុ​បារាំង​អន្តរ​ជាតិ​ RFI នៅ​ថ្ងៃ​ទី​១៣ ខែឧសភា អ្នក​សារ​ព័ត៌​មាន​ដែល​គ្មាន​ប្រាក់​ខែ​រូប​នេះ ថ្លែងថា លោក​ធ្លាប់​ត្រូវ​បាន​គេវាយ​ដំ គេបោក​ទូរសព្ទ​ចោល ដុត​ម៉ូតូ និង​ដុត​ផ្ទះ​ចោល​។ តែ​លោក​ថា នៅ​ពេល​លោក​ដាក់​ពាក្យ​បណ្តឹង​ដើម្បី​រក​យុត្តិ​ធម៌​ មន្ត្រី​មួយ​ចំនួន​ទាត់​ចោល​ពាក្យ​បណ្តឹង​របស់​លោក ហើយ​នៅ​ពេល​ដែល​ភាគី​ម្ខាង​ទៀត​ប្តឹង​លោក​វិញ គឺ​បែរ​ជា​មន្ត្រី​មាន​ចំណាត់​ការ​លឿន​ទៅ​វិញ​។

នៅដើមរដូវវស្សានេះ ផ្លែទុរេនរបស់កម្ពុជាចាប់ផ្តើមអាចប្រមូលផលជាបណ្តើរៗ។ តែយ៉ាងណាការនាំចូលទុរេនពីប្រទេសជិតខាង រួចក្លែងបន្លំថា ជាទុរេនដាំដុះក្នុងស្រុក នៅតែជាកង្វល់ ដែលឈ្មួញ និង​កសិករក្នុងស្រុកបន្តរអ៊ូរទាំ។ នៅក្នុងបទសម្ភាសជាមួយវិទ្យុបារាំងអន្តរជាតិRFI នៅថ្ងៃទី១១ ខែឧសភា លោក ឃឹម ប៊ុនឡែន ស្ថាបនិកនិងជាប្រធានសហគមន៍ចម្ការស្តេចទុរេន បានឲ្យដឹងថា ការនាំចូលទុរេនពីក្រៅប្រទេសបានប៉ះពាល់យ៉ាងធ្ងន់ធ្ងរដល់សុខភាពប្រជាពលរដ្ឋ និងប៉ះពាល់ដល់ទីផ្សាដែលប្រជាកសិករខ្មែរខំប្រឹងដាំដុះទុរេននៅក្នុងស្រុក។

អង្គការ​ជំនួយ​ផ្នែក​ច្បាប់​នៃ​កម្ពុជា​(LAC)​ បាន​ប្រកាស​នៅ​ថ្ងៃ​ទី​៦ ខែ​ឧសភា ឆ្នាំ​២០២៥ ​ពី​ការ​ផ្តល់​មេ​ធាវី​ជួយ​ការ​ពារ​អ្នក​សារ​ព័ត៌​មាន​ នៅក្នុង​ករណី​ពួកគេមាន​តម្រូវ​ការ​ពឹង​ពាក់​មេធាវី​ការ​ពារ​ក្តី។​ ក្នុង​បទ​សម្ភាស​ជា​មួយ​វិទ្យុ​បារាំង​អន្តរ​ជាតិ​RFI​ នៅ​ថ្ងៃទី​១០ ​ឧសភា លោក អ៊ុន ច័ន្ទថុល ​មេធាវី​របស់​អង្គការ​ជំនួយ​ផ្នែក​ច្បាប់​នៃ​កម្ពុជា បាន​បញ្ជាក់​ថា ភាគ​ច្រើននៃ​រឿង​ក្តី​របស់​អ្នក​សារ​ព័ត៌​មាន​ដែល​អង្គការ​នេះ​ដាក់​មេធាវីជួយ​ការ​ពារ​ក្តី​មិន​គិត​ថ្លៃ​ គឺ​ទទួល​បាន​ជោគ​ជ័យ ​ដោយ​អ្នក​សារព័ត៌​មាន​ដែល​រង​ការ​ចោទ​ប្រកាន់​មិន​ត្រូវ​បាន​ឃុំ​ខ្លួន​។

អាជ្ញាធរជាតិអប្សរាទើបបានប្រកាសដាក់ឲ្យសាកល្បងប្រើប្រាស់កម្មវិធី «Visit Angkor» ដើម្បីទទួល ឬផ្តល់ព័ត៌មានពាក់ព័ន្ធនឹងអង្គរវត្តទៅកាន់ភ្ញៀវទេសចរជាតិ និងអន្តរជាតិ។ ក្នុងកិច្ចសម្ភាសជាមួយវិទ្យុបារាំងអន្តរជាតិ RFI នៅថ្ងៃទី៩ ឧសភានេះ លោក ឡុង កុសល អគ្គនាយករង និងជាអ្នកពាក្យអាជ្ញាធរជាតិអប្សរាបានឲ្យដឹងថា កម្មវិធី «Visit Angkor» ត្រូវបានបង្កើតឡើងជាភាសាខ្មែរ និងភាសាអង់គ្លេស។ លោក ឡុង កុសលរំពឹងថា កម្មវិធី «Visit Angkor» នឹងអាចចូលរួមលើកស្ទួយវិស័យទេសចរណ៍ក្នុងខេត្តសៀមរាប និងលើកតម្លៃរមណីយដ្ឋានអង្គរ។

នៅថ្ងៃទី៥ ឧសភា នាយករដ្ឋមន្ត្រីកម្ពុជា លោក ហ៊ុន ម៉ាណែតបានប្រកាសដាច់ណាត់មិនឲ្យក្រុមហ៊ុនបរទេសចូលមកវិនិយោគលើបារីអេឡិចត្រូនិកក្នុងប្រទេសកម្ពុជាឡើយ។ នៅក្នុងបទសម្ភាសជាមួយវិទ្យុបារាំងអន្តរជាតិ RFI នាថ្ងៃពុធ ទី៧ ឧសភា លោកវេជ្ជបណ្ឌិត មុំ គង់ ប្រធានអង្គការចលនាដើម្បីសុខភាពកម្ពុជាបានគាំទ្រ និងសាទរលើការប្រកាសរបស់ប្រមុខរដ្ឋាភិបាលកម្ពុជា។ តាមលោកវេជ្ជបណ្ឌិត ការប្រើប្រាស់បារីអេឡិចត្រូនិកនៅកម្ពុជាបានកើនឡើងគួរឲ្យកត់សម្គាល់ ពិសេសនៅក្នុងចំណោមយុវវ័យ។ ក្នុងន័យនេះ លោកវេជ្ជបណ្ឌិតចង់ឃើញរដ្ឋាភិបាលរឹតបន្តឹងការនាំចូលបារីអាឡិចត្រូនិក និងបិទខ្ទប់ការផ្សាយពាណិជ្ជកម្មតាមបណ្តាញសង្គមទាំងអស់។

នៅ​ព្រឹក​ថ្ងៃ​ទី​០៦ ខែ​ឧសភា ឆ្នាំ​២០២៥ នេះ អាជ្ញាធរ​ខេត្ត​ព្រះសីហនុ​បាន​ប្រជុំ​ផ្សព្វ​ផ្សាយ និង​ពិគ្រោះ​យោបល់​ស្តីពី​លទ្ធផល​បឋម​នៃ​សេចក្តី​ព្រាង​របាយការណ៍​សិក្សា​វាយ​តម្លៃ​ផល​ប៉ះ​ពាល់​បរិស្ថាន និង​សង្គម​លើ​គម្រោង​បង្កើត​រោង​ចក្រ​កែ​ច្នៃ​អាលុយ​មីញ៉ូម និង​ផលិត​គ្រឿង​បន្ទាប់​បន្សំ​សម្រាប់​បន្ទះ​សូឡា​របស់​ក្រុមហ៊ុន​ឯក​ជន​។ ​ក្នុង​បទ​សម្ភាស​ជា​មួយ​វិទ្យុបារាំង​អន្តរ​ជាតិ ​RFI ​នៅ​ថ្ងៃ​ទី​៦ ឧសភា ​លោក ឡុង ឌីម៉ង់​ អ្នក​នាំពាក្យ​ខេត្ត​ព្រះសីហនុ​បញ្ជាក់​ថា ​គម្រោង​នេះ​ជា​ការ​កែ​ច្នៃ​កាក​សំណល់​រឹង​ដើម្បី​ធ្វើ​ស៊ុម​បន្ទះ​សូឡា​ ពោល​មិន​មែន​ជា​រោង​ចក្រ​ផលិត​បន្ទះ​សូឡា​ទេ​។