Ligwalagwala FM Current Affairs

Buyobe busindvwe ngebelitfole KaMhlushwa e Nkomazi kulesifundza se Mpumalanga namuhla. Umsakato wesive, Ligwalagwala FM, uhlanganisa iminyaka lengemas-44 kulenyanga, kantsi kuhlelwe sibhimbi sekujabulisa balaleli nebatsandzi balomsakato. Kutfola kabanti ngalomcimbi, sikhulumisana neBrand Specialist kuLigwalagwala FM, Mfanimpela Ndlala

Tinkambu tekuvuselela similo ebantfwaneni (Disciplinary Camp) tibonakala tikhombisa kwanza kulelive, lapho batali batfumela bantfwababo lebangahloniphi nalasebatigcila tetidzakamiva netjwala. Sicele lomunye lonalenkambu ePitoli, Simphiwe Prince Mazibuko lowatiwa nga Prince wa ko Pitori lone Dream Hub Disciplinary Boot Camp aphindze etfule luhlelo lwase-TV lelitsi Uth'uyKleva Bootcamp.

Libhuku lanamuhla linesihloko lesitsi Roses After Rain libhalwe nguRose Shabalala.

Namuhla lilanga lapho umhlaba wonkhe uchushisa ngesifo samalaleveva, World Malaria Day, lesitsatfwa njengalesiyingoti nangabe ungasisukumeli masinyane kumbe ungasigomeli kusenesikhatsi. Njengoba nati netimvula tichubeka nekuna lokungahle kubange timbuzulwane simeme Umnumzane Mandla Zwane longumcondzisi weligumbi letifo letingatsatselani etikweni letem[philo kulesifundza seMpumalanga.

Kulindzeleke kutsi emacembu - iOrlando Pirates ne Kaizer Chiefs - atfolane etulu ngalemphelasontfo enkhundleni yetemidlalo i FNB kumidlalo kuBetway Premiership. Sikhulumisana nemetfuli wetemidlalo kuwo umsakato Ligwalagwala FM, Sibusiso "SD" Mashabane.

Litiko letekuphepha kwemphakatsi, kuvikeleka nekuchumana kulesifundza sase-Mpumalanga lisukumise umkhankaso wekugcugcutela kuphepha kwalabo labahamba ngetinyawo emigwacweni kanye nekuphepha kwebashayeli.Sikhulumisana nemphatsiswa walelitiko Jackie Macie.

Betemphilo bakhutsata bantfu kutsi bagomele umkhuhlane njengoba kungena busika. Ngekusho kwaba dokodela lesi sikhatsi lesikahle sekugomela umkhuhlane. Kepha kukhuluma kabanti ngalesimo sikhulumisana nadokodela lotimele lapha eMbombela, Dr Simangele Nkosi.

Sikhulumisana nentsantseli yetfu lapha kaSABC, Calvin Dludla mayelana nekuvela enkantolo kwemphatsi wemaphoyisa kumasipala wase-Ekurhuleni Julius Mkhwanazi kanye nemphatsi walomasipala Kagiso Lerutla.

Sekubikwe kutsi senyukile sibalo sebantfu labangenwe sifo samalaleveva kulesifundza seMpumalanga, kulandzela kuna ngemandla kwetimvula. Sikhulumisana nemphatsi weligumbi letifo letingatsatselani etikweni letemphilo kulesifundza seMpumalanga Umnumzane Mandla Zwane

Sikhungo lesiholela imphesheni iSASSA, setfule indlela yesimanje manje yekufakwa kweticelo tesibonelelo sahulumeni njengendlela yekunciphisa kugcwala emahhovisi aso. Kukhuluma kabanti ngalendzaba sichumana nalokhulumela iSASSA kulesifundza seMpumalanga Umnumzane Senzeni Ngubeni

Sebacalile kutseleka edolobheni lase-Mbombela eMpumalanga badlali be-Tennis kanye netivakashi temave emhlaba kutewuhlanganyela emdlalweni lobitwa nge-Global Series M15 & W15 World Tennis Tour. Kepha lotasichazela kancono ngalemidlalo, ngumhlelembisi wayo, Sabelo Mathebula...

Inhlangano yemakomanisi kuleli i SACP seyikucinisekisile kutsi itawungela lolukhefto lwabo hulumende basekhaya itimele ngemuva kwekutsi tingcongco tayo neANC, tehluleke kuphuma nesisombululo kuloludzaba. Lenhlangano beyikhuluma nebetindzaba namuhla e Braamfontein ngemuva kwekusola iANC ngekukhetsisa emalunga kutsi asho kutsi atawukhankasela iANC noma iSACP. Kusesenjalo, nayo iANC itiphendvulele kuloko lokushsiwo yiSACP. Kubuka umtselela waloku, simeme umhlatiyi wetindzaba te politiki, Khaya Sithole..

Litiko letemphilo kulesifundza se Mpumalanga letfule ngalokusemtsetfweni ligumbi lemshini yekulekelela tigulane letiphetfwe tinso esibhedlela i Rob Ferreira lesilapha eMbombela (Dialysis Unit). Kutfola kabanti ngekubaluleka kwaleligumbi nekutsi batawusitakala kanganani bantfu balesifundza sikhulumisana nemphatsiswa welitiko letemphilo eMpumalanga, Sasekani Manzini.

Umisiwe emsebentini Nkomishana wemaphoyisa Jenene Fannie Masemola. Kuva kabanti kutsi inyonyana yemaphoyisa i SAPU iphawula itsini simeme lokhulumela lenyonyana Umnumzane Lesiba Thobakgale ..

Mengameli Cryil Ramaphosa sewumise emsebentini Nkomishana wemaphoyisa Fanie Masemola kulandzela kuvela kwakhe enkantolo. Mengameli Ramaphosa ubese umemetela Major-General Puleng Dimpane njengalotawubamba kwesikhashana kulesikhundla saNkomishana wemaphoyisa akulelive. Kukhuluma ngalendzaba sicele sati ngetebugebengu, Dkt Mxolisi Mathebula..

Masipala weNkomazi kulesifundza seMpumalanga utsi usabuka lomonakalo lowentiwe ngulemvula etabelweni letitsite kulomasipala. Palesa Sotomela uyasibikela

Labahola imali yesibonelelo sahulumende bavakalise kukhatsateka ngekungatfoli lusito ngalokufanele emahhovisi esikhungo lesiniketwe umsebenti wekuholela tibonelelo tahulumende iSASSA eMalahleni kulesifundza seMpumalanga. Michael Mdluli uyasibikela.

Indvuna yelitiko letemphilo kulelive Dr Aaron Motsoaledi uvumile kutsi kutfola lusito letekwelashwa kubita kakhulu kulelive ngalesikhatsi kuhlangenwe kuNEDLAC. Loku kuta ngemuva kwekutsi tinyonyana letingephasi kwe-COSATU tingenele imibhikisho yekukhonondza ngekukhushulwa kakhulu kwemali yemedical Aid yetisebenti tahulumende, iGEMS. Kukhuluma kabanti ngalokuphunywe nako kulomhlangano sichumana nalokhulumela iCOSATU Zanele Sabela

Kungcola kwemoya yinkinga lebukene nemhlaba wonkhe kantsi nalesifundza seMpumalanga ngulenye yetindzawo letigcwele timayini netimboni letisolwa ngekungcolisa umoya. Njengaleminye yemitamo yekulwa nalenkinga kulesifundza, sikhungo lesikhutsata kutfutfukiswa kwemnotfo loluhlata, i-Mpumalanga Green Cluster Agency, simema bantfu kutsi bangenele umncintiswano wekukhangisa ngetinhlelo letinsha tekukhicita emandla langangcolisi umoya. Kuva kabanti ngaloludzaba asamukela Samukelisiwe Chirwa loyi- Enterprise Development Officer ku-Mpumalanga Green Cluster Agency (MGCA)

Kushone bantfu labasitfupha eLimpopo ngemuva kwetinsolo letitsi badle kudla lokonakele emngcwabeni. Kuyibuka lendzaba sikhulumisana na-Nonhle Shabangu kanguthishela wetekudla.