Report

យុវជន តុង លេន ជនជាតិដើមភាគតិចពូនង និងជាអ្នកថតរូបឯករាជ្យបានប្រើប្រាស់ជំនាញចាប់យករូបភាពតាមរយៈកញ្ចក់កាមេរ៉ា ដើម្បីរក្សាអត្តសញ្ញាណវប្បធម៍ និងប្រពៃណីរបស់ជនជាតិដើមភាគតិច។ ចំពោះយុវជន តុង លេន រូបថតនីមួយៗមានអត្ថន័យជ្រាលជ្រៅ ដែលបង្ហាញពីសកម្មភាពផ្សេងៗរបស់ជនជាតិដើមភាគតិច ពិសេសការចូលរួមអភិរក្សធនធានធម្មជាតិ។ ក្នុងន័យនេះ តុង លេន ចង់ឃើញរដ្ឋាភិបាល ដៃគូរអភិវឌ្ឍន៍ និងសង្គមស៊ីវិលគោរពសិទ្ធិ និងគាំទ្រសកម្មភាពការពារធនធានធម្មជាតិរបស់ជនជាតិដើមភាគតិច៕

ក្រោយពីបានជោគជ័យកាលពីឆ្នាំ២០២៤ ព្រឹត្តិការណ៍«ផ្សារបារាំង»ដែលមានការតាំងពិព័រណ៍ និងលក់ផលិតផល សេវាកម្ម ព្រមទាំងម្ហូបអាហារបែបបារាំងត្រូវបានរៀបចំធ្វើឡើងសាជាថ្មី ដោយសភាពាណិជ្ជកម្ម និងឧស្សាហកម្មបារាំងកម្ពុជា នៅក្នុងបរិវេណស្ថានទូតបារាំង នាទីក្រុងភ្នំពេញ កាលពីថ្ងៃសៅរ៍ ទី២២ ខែវិច្ឆិកា ឆ្នាំ២០២៥។ ព្រឹត្តិការណ៍ប្រចាំឆ្នាំនេះ មិនត្រឹមតែបានទាក់ទាញសាធារណជនកាន់តែច្រើននិងសប្បាយជាងមុនប៉ុណ្ណោះទេ ប៉ុន្តែវាក៏រក្សាបាននូវទំនាក់ទំនងកាន់តែជិតស្និទ្ធរវាងកម្ពុជា-បារាំង ជាពិសេស នៅក្នុងអំឡុងពេលដែលប្រទេសកម្ពុជាកំពុងត្រៀមខ្លួននៅក្នុងការធ្វើជាម្ចាស់ផ្ទះ នៃកិច្ចប្រជុំកំពូលប្រទេសនិយាយភាសាបារាំងហៅថាហ្វ្រង់កូហ្វូនី។

គ្រាប់កាហ្វេខេត្តមណ្ឌលគិរីមានទីផ្សារល្អ និងទទួលបានការគាំទ្រពីប្រជាពលរដ្ឋខ្មែរភាគច្រើន។ តែការផ្គត់ផ្គង់នៅមិនទាន់អាចឆ្លើយតបតាមតម្រូវការទីផ្សារនៅឡើយទេ។ ក្នុងន័យនេះ ម្ចាស់ចំការកាហ្វេមួយកន្លែងក្នុងខេត្តមណ្ឌលគិរីបានមើលឃើញពីឱកាសនៃការពង្រីកការដាំដុះថែមទៀត។ តែម្ចាស់ចំការកាហ្វេដដែលរូបនេះមិនភ្លេចលើកឡើងពីការលំបាកខ្លះ ពិសេសបច្ចេកទេសនៃការដាំដើមកាហ្វេដែលមានភាពស្មុគស្មាញខ្លាំង។

មហោស្រពរូបថតភ្នំពេញលើកទី១៦ ក្នុងឆ្នាំ២០២៥ បានរៀបចំឡើងជាមួយនឹងទស្សនីយភាពថ្មីនៃការដាក់តាំងស្នាដៃរូបថត និងភាពយន្តឯកសាររបស់ក្រុមអ្នកជំនាញផ្នែកថតរូបទាំងជាតិ និងអន្តរជាតិ។ ក្នុងរយៈពេលមួយខែនៃការដាក់តាំងបង្ហាញនេះ មហាស្រពរូបថតភ្នំពេញក្លាយជាវេទិកាដែលអនុញ្ញាតឲ្យអ្នកចង់ចាប់អាជីពថតរូប និងអ្នកស្រលាញ់រូបថតអាចជួបក្រុមអ្នកជំនាញដើម្បីសិក្សាស្វែងយល់ពីការថតរូប។

វិទ្យាល័យស្រអែមជាសាលារៀនមួយក្នុងចំណោមសាលារៀនជាង ៦០០ផ្សេងទៀតដែលស្ថិតនៅក្នុងតំបន់ក្តៅនៃបន្ទាត់ព្រំដែនខ្មែរ ថៃក្នុងភូមិស្រអែមខាងត្បូង ឃុំកន្ទួត ស្រុកជាំក្សាន្ត ខេត្តព្រះវិហារ។ វិទ្យាល័យស្រអែមត្រូវបានបិទទ្វារតាំងពីថ្ងៃផ្ទុះសង្គ្រាមជាមួយថៃក្នុងថ្ងៃទី២៤ ខែកក្កដា ឆ្នាំ២០២៥។ សម្រាប់បវេសនកាលឆ្នាំថ្មី ២០២៥-២០២៦ វិទ្យាល័យស្រអែមបានបើកទ្វារឡើងវិញជាមួយនឹងការណែនាំដល់សិស្សានុសិស្សអំពីគ្រោះថ្នាក់នៃសំណល់ជាតិផ្ទុះ និងគ្រោះថ្នាក់ផ្សេងៗនៃសង្គ្រាមដែលអាចកើតមានជាថ្មីម្តងទៀត។

កម្ពុជាមានដំរីស្រុកប្រមាណជាង ៧០ក្បាល និងដំរីព្រៃពី​​​​ ៦០០ ទៅ ៨០០ ក្បាល ដែលកំពុងរស់នៅក្នុងព្រៃធម្មជាតិ ក្នុងភូមិភាគឦសាន តំបន់ជួរភ្នំក្រវាញ និងតំបន់ព្រៃឡង់ជាដើម។ ​នៅ​ក្នុង​ដី​ព្រៃខេត្តមណ្ឌលគិរី គម្រោងជ្រលងដំរីកំពុង​ជួយ​សង្គ្រោះ​​ដំរីចំនួន ៧ក្បាល​ឲ្យ​បាន​រស់​តាម​បែប​ធម្មជាតិ ​ដោយ​ជនជាតិ​ដើម​ភាគ​តិច​ពូនង​។ ការ​អភិវឌ្ឍ​អេកូ​ទេសចរណ៍​នៅ​ក្នុង​តំបន់​ទាក់ទាញ​ដោយសត្វ​​​ដំរី​មួយនេះ​ កំពុង​តែ​ជម្រុញ​ឲ្យ​សហគមន៍​ជនជាតិ​ដើម​ ចូលរួម​ការពារ​ព្រៃឈើ​។ ឯម្ចាស់ដំរី និងសត្វដំរី ក៏​​អាចទទួលបាន​ប្រាក់ចំណូល​ពីតំបន់អេកូទេសចរណ៍មួយនេះដែរ​។

ពលរដ្ឋរស់នៅតំបន់រុនតាឯកលើកឡើងពីការលំបាកដោយសារតែទីនោះពុំមានដង្ហើមសេដ្ឋកិច្ច។ ភាពស្ងាត់ជ្រងំ និងផ្ទះទុកចោលមិនមានមនុស្សនៅ គឺជាបញ្ហាពិបាកក្នុងការប្រកបរបរចិញ្ចឹមជីវភាពប្រចាំថ្ងៃរបស់ពួកគេ។ អ្វីដែលពួកគេចង់បាន គឺការរៀបចំតំបន់រុនតាឯកឲ្យមានដង្ហើមសេដ្ឋកិច្ច ដូចជាការសាងសង់រោងចក្រ ជាដើម។ ចំណែក អាជ្ញាធរខេត្តសៀមរាបបានបញ្ជាក់ថាកំពុងគិតគូរដោះស្រាយបញ្ហានេះជូនពលរដ្ឋនៅតំបន់រុនតាឯកហើយ។

នៅក្នុងរយៈពេលប្រាំថ្ងៃនៃការកើតមានចម្បាំងរាំងជលនៅតាមព្រំដែន កម្ពុជា-ថៃ យោធាថៃបានប្រើប្រាស់អាវុធយុទ្ធភណ្ឌជាច្រើនប្រភេទ រួមទាំងអាវុធធុនធ្ងន់ គ្រាប់បែកចង្កោម យន្តហោះប្រតិកម្ម ដ្រូនអត្តឃាត ព្រមទាំងផ្សែងពុលមានបង្កប់សារធាតុគីមីជាច្រើនទៀត ដែលបង្កទាំងផលប៉ះពាល់ផ្ទាល់ភ្លាមៗ និងយូរអង្វែង។ ជាអ្នករស់នៅតាមខ្សែបន្ទាត់ព្រំដែន ពលរដ្ឋអ្នកជាយដែនដែលជាជនរងគ្រោះផ្ទាល់នៅទីនោះ នៅតែមិនអស់ចិត្តនិងនៅតែបារម្ភចំពោះគ្រោះថ្នាក់នៃសារធាតុគីមី និងផ្សែងបំពុលរបស់ថៃ ដែលអាចបង្កទៅលើសុខភាពមនុស្ស និងបរិស្ថាន ជាពិសេសលើប្រភពទឹក ដែលពួកគេប្រើប្រាស់ប្រចាំថ្ងៃ ។

ស្ថិតនៅក្នុងទីតាំងមួយ ក្នុងភូមិធម្មជាតិ ក្នុងឃុំស្រអែម ស្រុកជាំក្សាន្ត ចំងាយជាង ១០គីឡូម៉ែត្រ ពីព្រំដែនខ្មែរ-ថៃ នៅក្បែរប្រាសាទព្រះវិហារ និងសមរភូមិភ្នំទ្រព្យ ប្រជាជនជនភៀសសឹកប្រមាណជាង ៨០% បានវិលត្រឡប់ចូលលំនៅដ្ឋានរបស់ខ្លួនវិញនៅដើមខែវិច្ឆិកា ឆ្នាំ២០២៥នេះ។ ការវិលត្រឡប់ចូលលំនៅដ្ឋានរបស់ជនភៀសសឹកនេះ គឺនៅក្រោយការចុះហត្ថលេខាកិច្ចព្រមព្រៀងសន្តិភាពរវាងកម្ពុជា-ថៃ ដែលបានធ្វើឡើងកាលពីថ្ងៃទី២៦ ខែតុលា ឆ្នំា២០២៥។ ប៉ុន្តែស្ថានភាពព្រំដែនហាក់មានសភាពរំជើបរំជួល និងតានតឹងឡើងវិញ ដោយសារតែភាគីថៃផ្អាកអនុវត្តកិច្ចព្រមព្រៀងសន្តិភាព។ ទោះជាយ៉ាងណាក៏ដោយ រហូតមកដល់ថ្ងៃសុក្រ ទី១៤ វិច្ឆិកានេះ ប្រជាជនអ្នកភូមិធម្មជាតិ នៅតែបន្តរស់នៅក្នុងភូមិ និងត្រូវបង្ខំចិត្តប្រកបមុខរបររកស៊ីឡើងវិញ ដើម្បីដោះស្រាយជីវភាព ទោះបីជាមានការព្រួយបារម្ភពីសុវត្ថិភាពផ្ទាល់ខ្លួន។

ផ្សារជនជាតិដើមភាគតិចក្នុងខេត្តមណ្ឌលគិរី គឺជាផ្សារលក់បន្លែ ផ្លែឈើធម្មជាតិ និងបន្លែព្រៃរបស់ជនជាតិដើមភាគតិចពូនង។ អាជីវករលក់បន្លែនៅផ្សារជនជាតិដើមភាគតិចបានសង្កេតឃើញថា បន្លែធម្មជាតិរបស់ពលរដ្ឋជនជាតិដើមភាគតិចនេះហាក់ទាក់ទាញការចាប់អារម្មណ៍ និងគាំទ្រច្រើនពីអតិថិជនក្នុងតំបន់ និងអតិថិជនដែលជាភ្ញៀវទេសចរមកពីខេត្ត ក្រុងផ្សេង ពិសេសក្រុងភ្នំពេញ។

ចេតិយ ស្តូបរំលឹកវិញ្ញាណក្ខន្ធ​របស់​ទាហាន​បរទេស ក្នុងនោះមួយចំនួន​មកពីកម្ពុជា​កំពុងត្រូវ​គេ​បោះបង់ចោលឲ្យ​​សឹករិចរិល នៅ​សួន​ឧទ្យាន​គ្រប់គ្រង​ដោយ​សាលាក្រុងប៉ារីស។ នេះជា​ការសង្កេត​របស់​សមាគម Fragment Vitae Asia។ នៅថ្ងៃអង្គារ​ទី​១១​វិច្ឆិកានេះ ថ្ងៃ​ដែល​បារាំងរំលឹក​ខួប​លើកទី​១០៧ នៃ​ការបិទបញ្ចប់​សង្រ្គាម​លោកលើកទី​១ ​សមាគម​ប្រមូលផ្តុំ​ដោយ​កូនខ្មែរកើតធំដឹងក្តី​នៅប្រទេស​បារាំងបាន​ដាក់ញត្តិ​​ទាមទារ​ឲ្យចៅហ្វាយក្រុង​ប៉ារីស​យកចិត្ត​ទុកដាក់ ជួសជុល​ចេតិយ​ដែលសាងសង់​ឡើង​កាលពី​៩៨ឆ្នាំមុន​ដើម្បី​រំលឹក​ដល់​វិញ្ញាណក្ខន្ធ​របស់​ទាហាន​ខ្មែរ​ និង​ឡាវ​ដែល​ស្លាប់​ក្នុង​សមរភូមិ​ក្នុងទឹកដីបារាំង​អំឡុង​សង្រ្គាមលោកលើកទី១។ នៅក្នុង​បទយកការណ៍​នៅថ្ងៃនេះ ឈាង បុប្ផា​បានជួបសម្ភាសន៍ ថ្នាក់ដឹកនាំ​របស់​សមាគមនៅ​សួន​ឧទ្យាន​នៅជាយក្រុង​ប៉ារីស ជាទីដែលមាន​ចេតិយរំលឹក​វីរកងទ័ព​ខ្មែរ​ក្នុង​សង្រ្គាម​លោកលើកទី១។ អ្នកអាច​ចុចតំណភ្ជាប់នេះ​ដើម្បីចូលរួម​នៅក្នុង​ញត្តិតវ៉ា​ទៅសាលាក្រុង​ប៉ារីស៖ https://c.org/5hgjDk4g8w

នៅទីបំផុត នៅក្រោយការចុះហត្ថលេខាសន្តិភាព ដែលធ្វើឡើងនៅក្នុងកិច្ចប្រជុំកំពូលអាស៊ាន លើកទី៤៧ នៅប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥ ប្រជាពលរដ្ឋភៀសសឹកទាំងអស់ត្រូវចាកចេញពីមណ្ឌលសុវត្ថិភាព និងវិលត្រឡប់ទៅកាន់ទីលំនៅដ្ឋានវិញរៀងៗខ្លួន។ ការចុះហត្ថលេខាសន្តិភាពនេះធ្វើអោយពលរដ្ឋភៀសសឹកមួយចំនួនធំសប្បាយចិត្ត ប៉ុន្តែក៏មានពលរដ្ឋភៀសសឹកមួយចំនួនតូចផ្សេងទៀត នៅបន្ត ព្រួយបារម្ភចំពោះសុវត្ថិភាព ការបាត់បង់ផ្ទះសម្បែង និងការប្រឈមទៅនឹងបញ្ហាជីវភាពខ្វះខាតជាក់ស្តែង។

ទឹកជន់មិនទាន់ស្រក ជាបញ្ហាដែលអ្នកប្រកបរបរនេសាទត្រីកំពុងប្រឈម ហើយមិនអាចចាប់ត្រីបានច្រើនតាមការពេញចិត្តរបស់ពួកគេ។ ប្រជានេសាទនៅកណ្តាលទីក្រុងភ្នំពេញ ហាក់ចម្លែកចិត្ត ដោយសាររាល់ឆ្នាំកន្លងទៅ ទឹកចាប់ផ្តើមស្រកតាំងពីដើមខែវិច្ឆិកានេះមកម្ល៉េះ។ ក៏ប៉ុន្តែមកដល់ពេលនេះ កម្រិតទឹកនៅខ្ពស់គួរសមនៅឡើយ។ ទោះយ៉ាងណាពួកគេបានត្រៀមខ្លួនសម្រាប់ការប្រមូលផលត្រីនៅក្នុងពេលឆាប់ៗខាងមុខនេះ។

សិប្បកម្ម​​កែច្នៃថ្មធ្វើជាគ្រឿងតុបតែងលម្អផ្ទះ គឺ​ជារបរប្រពៃណីដ៏ពេញនិយម​មួយ​របស់ពលរដ្ឋនៅភូមិភ្នំជញ្ជាំង ឃុំជប់វ៉ារី ស្រុកព្រះនេត្រព្រះ ខេត្តបន្ទាយមានជ័យ។ សិប្បករអាច​កែច្នៃថ្មភ្នំ​​ទៅជាការ៉ូ ឬគ្រឿងតុបតែងលម្អយ៉ាងល្អប្រណិត​ ព្រោះតែសាច់ថ្មនោះ​អំណោយផលពីធម្មជាតិ ដែល​មើលទៅដូចជាគំនូរ​​ និង​មានសណ្ឋានដូចឈើបេងដ៏មានតម្លៃ​។ បច្ចុប្បន្ននេះ ថ្មភ្នំស្រុកព្រះនេត្រព្រះ ត្រូវបានគេកែច្នៃធ្វើជាការ៉ូក្រាល ឬការ៉ូបិទជញ្ជាំង ដែលមានតម្លៃខ្ពស់។

កាលពីថ្ងៃសៅរ៍ទី ២វិច្ឆិកា ប្រជាជនខ្មែរ ដែលមួយចំនួនជាកូនកាត់បារាំងខ្មែរបានចូលរួមគ្នារត់ ក្នុងព្រឹត្តិការណ៍ ម៉ារ៉ាតុង Ekiden de Paris រៀបចំឡើងដោយក្រុមហ៊ុនធានារ៉ាប់រងបារាំង Maif។ ក្រោមគំនិតផ្តួចផ្តើម និងការជំរុញលើកទឹកចិត្តពីលោកស្រី លី ណារី ប្រជាជនខ្មែរបានលើកបង្ហាញទង់ជាតិកម្ពុជានៅ ក្នុងព្រឹត្តិការណ៍ប្រកួតកីឡានៅទីក្រុងប៉ារីស។

ទោះបីជាកម្ពុជាបានប្រកាសផ្អាកការប្រារព្ធពិធីបុណ្យអុំទូក បណ្តែតប្រទីប និងសំពះព្រះខែ ថ្នាក់ជាតិ ដែលត្រូវប្រព្រឹត្តធ្វើឡើងនៅថ្ងៃទី៤ ដល់ថ្ងៃទី៦ ខែវិច្ឆិកាឆ្នាំ២០២៥នេះ ដោយបញ្ហាជម្លោះព្រំដែនកម្ពុជា-ថៃ ប៉ុន្តែការប្រារព្ធពិធីបុណ្យអុំទូកនៅតាមបណ្តាខេត្តមួយចំនួននៅបន្តធ្វើឡើងជាទ្រង់ទ្រាយតូចដើម្បីរក្សាភ្ជាប់វប្បធម៌ និងអរិយធម៌វ័យចំណាស់មួយនេះ។ នៅក្នុងខេត្តសៀមរាប កម្មវិធីនៃការប្រណាំងទូកមិត្តភាពខ្នាតតូចបានទាក់ទាញភ្ញៀវទេសចរជាតិ និងអន្តរជាតិយ៉ាងច្រើនកុះករ។

ក្នុងរយៈពេល២ថ្ងៃ គឺនៅថ្ងៃទី១ និងទី​២ ខែវិច្ឆិកា ឆ្នាំ២០២៥ ស្តង់ក្រុមហ៊ុនឯកជនជាច្រើនបានចូលរួមក្នុងពិព័រណ៍ការងារ ដែលរៀបចំដោយក្រសួងការងារ និងបណ្តុះបណ្តាលវិជ្ជាជីវៈ។ យុវជនជាច្រើន​បានចាប់អារម្មណ៍ចូលរួមកម្មវិធីមួយនេះ ក្នុងគោលបំណង​ស្វែងរកការងារធ្វើ ទៅតាមក្តីស្រមៃ និងតាម​ជំនាញរបស់ខ្លួន​។ ដើម្បីអាចសម្រេចទៅបាន ពួកគេ​ចង់ឱ្យ​មាន​​សិក្ខាសាលាតម្រង់ទិសសិស្សនិស្សិតនៅ​​តាមសកលវិទ្យាល័យ​​៕

ល្ខោនពោល​ស្រី គឺជា​ល្ខោន​មួយ​នៃ​ភូមិ​ទួល​ក្របៅ ឃុំ​គគីរ ស្រុក​កៀនស្វាយ ខេត្តកណ្តាល ដែលអ្នកសម្ដែងសុទ្ធតែស្រី។បន្ទាប់ពីឈប់សម្ដែងអស់រយៈពេលជាង ៤០ឆ្នាំ ល្ខោនពោលស្រី ស្ទើរតែគ្មានអ្នកស្គាល់។​មរតកមនុស្សរស់ លោកស្រី គិន យិន និងព្រឹទ្ធាចារ្យលោកស្រី ជា មុត បានលះបង់កម្លាំងកាយចិត្តស្ទើរតែពេញមួយជីវិត ដើម្បីអភិរក្ស និងផ្ទេរចំណេះដឹងល្ខោនពោលស្រីដល់យុវជនជំនាន់ក្រោយ៕

នៅក្នុងវ័យ២៧ឆ្នាំ សិល្បករ យ៉ូន មុនដែត គឺជាអ្នកចម្រៀងរ៉េប ជនជាតិព្រៅ ដំបូងគេម្នាក់ ដែលតំណាងឲ្យសំឡេងជនជាតិដើមភាគតិចនៅកម្ពុជា។ សិល្បកររូបនេះបានចាប់អារម្មណ៍ទៅលើការផលិតនិងការតែងនិពន្ធបទភ្លេង និងបទចម្រៀងដែលមានទំនាក់ទំនងនឹងជនជាតិដើមភាគតិច ជាពិសេសនៅក្នុងសម័យទំនើបនេះ ក្នុងគោលបំណងនៃការអភិរក្សភាសា និងអត្តសញ្ញាណជនជាតិដើមភាគតិចកុំឲ្យបាត់បង់ ហើយក៏ដើម្បីផ្សព្វផ្សាយទៅដល់ពិភពលោកឲ្យស្គាល់ពីជនជាតិដើមភាគតិចតាមរយៈវិស័យសិល្បៈផងដែរ។

កាលពីថ្ងៃសៅរ៍កន្លងទៅ លោកសមរង្ស៊ី​បាន​ប្រកាស​បង្កើត​ជាផ្លូវការ​រដ្ឋាភិបាល​កម្ពុជា​ឯករាជ្យ​២៣​តុលា។ ក្នុង​ចំណោម​មនុស្ស​ប្រមាណ​៥០០នាក់​ដែលមានវត្តមាន​នៅក្នុង​សាលប្រជុំ​រៀបចំ​ក្នុងទីក្រុង​ប៉ារីស​ មាន​អ្នកចូលរួម​ជិត​១០០នាក់​ដែលបានធ្វើដំណើរ​មកពីបរទេស ដូចជា ស៊ុយអែត ស្វ៊ីស អាល្លឺម៉ង់ សហរដ្ឋអាមេរិក កាណាដា នូវែលសេឡង់ ជប៉ុន និង​កូរ៉េខាងត្បូង។ នៅមុនធ្វើដំណើរ​ត្រលប់ទៅប្រទេស​ដែលខ្លួនរស់នៅ ក្រុមប្រតិភូខ្មែរ​ដែលមួយចំនួន​ជា​សមាជិក​របស់​រដ្ឋាភិបាល​ក្រៅប្រទេស​បាន​ធ្វើដំណើរ​ទៅ​ធ្វើទស្សនកិច្ច​នៅ​វត្ត​ពោធិ៍វង្ស ជាយក្រុង​ប៉ារីស។ តើអ្នកចូលរួម​ក្នុង​រដ្ឋាភិបាល​កម្ពុជាឯករាជ្យ​២៣​តុលា​ជាអ្នកណា ហើយហេតុអ្វីបាន​ជាពួកគេ​ទាំងនោះ​សម្រេចចិត្ត​ចូលរួម​ក្នុង​រដ្ឋាភិបាលក្រៅប្រទេស? យើងស្តាប់​បទយកការណ៍​របស់​ឈាង បុប្ផាដែល​​បានទៅជួបសម្ភាសន៍នៅ​វត្ត​ពោធិវង្ស។